Hoxe, 9 de xuño, celébrase o Día Internacional dos Arquivos, instituído en 2007 para dar a coñecer os arquivos e apoiar ao persoal que traballa neles. Esta data foi elixida en conmemoración da creación do Consello Internacional de Arquivos (ICA), baixo os auspicios da UNESCO, o 9 de xuño de 1948. O ICA con esta conmemoración quere promover o valor dos arquivos e dos arquiveiros a nivel internacional, dado que desempeñan un papel importante na rendición de contas, a transparencia, a democracia, o patrimonio, a memoria e a sociedade.

Tui acollerá o próximo luns, 8 de xuño, a presentación da Campaña “A Bandeira da Democracia” e do número especial de Cuadernos de Pedagogía dedicado ao II Congreso Eurocidade Tui-Valença celebrado o pasado mes de xaneiro.

O alcalde de Tui, Enrique Cabaleiro, participou esta mañá na inauguración do Parque da Paz na cidade alemá de Versmold coa que Tui está irmandada.

O rexedor tudense foi convidado polo burgomestre de Versmold Michael Meyer-Hermann a participar neste acto que marca un fito no desenvolvemento urbano da cidade xermana. Trátase dun espazo central da cidade que se converte nun punto de encontro, de intercambio e de convivencia para a veciñanza e cuxa remodelación forma parte do Plan Integral de Desenvolvemento Urbano de Versmold.

O salón de sesións da casa do concello de Tui acolleu este mediodía a recepción ao equipo Alevín do Tyde F.C. que esta fin de semana vai participar no Torneo Internacional de Fútbol en Versmold, Alemaña.  O alcalde de Tui, Enrique Cabaleiro, e o concelleiro de Deportes de Tui, Rafael Estévez, recibiron aos xogadores e xogadora que está mesma tarde viaxan cara Alemaña. No acto participaron tamén a concelleira de Cultura, Ensino e Mocidade, Sonsoles Vicente, o presidente do Tyde F.C, David Domínguez, e membros da xunta directiva do club.

Mañá venres, 5 de xuño, ás 20.00 h, no Espazo Cultural da rúa Camilo José Cela de Tui, terá lugar a presentación da obra colectiva “Patrimonio lúdico galego: investigación, recursos e divulgación dos xogos tradicionais”. Trátase dunha obra considerada fundamental no estudo dos xogos tradicionais galegos, pois reúne colaboracións de ata 42 autorías desde moi diferentes perspectivas, desde estudos teóricos ata a descrición de proxectos xa desenvolvidos ou a proposta de novas iniciativas para investigar e poñer en valor os nosos xogos.

Hoxe xoves ,4 de xuño, ás 13.30 horas, no salón de plenos do Concello de Tui, terá lugar a recepción ao equipo alevín do Tyde F.C. que un ano máis participará no Torneo Internacional de Versmold, que se celebrará na cidade alemán este fin de semana, grazas ao acordo de irmandade entre as dúas cidades.

Participarán na recepción o alcalde de Tui, Enrique Cabaleiro, o concelleiro de Deportes de Tui, Rafael Estévez, concelleiros e concelleiras de Tui, así como o presidente do Tyde F.C, David Domínguez, membros da xunta directiva e os integrantes do equipo alevín.

O Concello de Tui ven de iniciar o procedemento para adxudicar as cinco vivendas rehabilitadas no edificio municipal, no barrio do Monte, en Caldelas para destinalas a alugueiro social.  Durante un prazo de vinte días naturais, contados dende onte, cando se publicou o anuncio no BOPPO, pódense presentar as solicitudes, no modelo dispoñible na web municipal ou na casa do concello, para a inclusión na Listaxe de demandantes de vivenda de alugueiro social.

O Concello de Tui vén de acadar a renovación da declaración de municipio de gran afluencia turística. O Diario Oficial de Galicia publica hoxe a resolución do conselleiro de Emprego, Comercio e Emigración pola que se aproba a renovación da declaración de Tui como zona de grande afluencia turística. Esta declaración, que a cidade acadou por primeira vez en 2012, permite que os establecementos comerciais de todo o termo municipal poidan abrir de luns a domingo, incluídos os festivos, en horario de 10 a 22 horas.

A corporación municipal de Tui aprobou, o pasado xoves en pleno ordinario, por unanimidade habilitar un crédito extraordinario de 533.279,38 euros, con cargo ao remanente de tesourería, para expropiar as parcelas precisas para a ampliación do CEIP nº1  e crear un parque e para continuar os traballos arqueolóxicos na Praza do Pracer.