Mañá xoves, 17 de agosto, ás 10.30h no salón de sesións da casa do concello de Tui terá lugar a presentación dos actos a celebrar este próximo sábado, 19 de agosto, dentro da Festa do Miño organizados polo Concello de Tui.

A presentación correrá a cargo do alcalde de Tui, Enrique Cabaleiro, da concelleira de Cultura, María José González, dun representante de cada asociación que participará na Festa Gastronómica e do concerto musical Mitic, el espectáculo, que actuará no remate da xornada.

Até o martes 5 de setembro está aberto o prazo de presentación de solicitudes para participar no proceso selectivo para cubrir tres prazas de profesores para a Escola de Música e o Conservatorio Profesional de Música de Tui.

A praza de San Fernando acollerá este venres, 11 de agosto, ás 22.15h a proxección da película de animación “Mascotas”. Esta é a terceira entrega do cinema de verán programado para os meses de xullo e agosto dentro da programación cultural do Concello.

Neste filme dirixido a público familiar os protagonistas son Max e Duke, dous cans que rivalizan por ser a mascota preferida da súa dona. Ambos, deixan a un lado as súas diferencias para facer fronte ao plan do coello Snowball que quere formar un exército de animais domésticos abandonados para vingarse dos seus donos.

Dar a coñecer o importante patrimonio vinculado á cultura xudía é o obxectivo das actividades que se van celebrar en Tui do 1 ao 3 de setembro dentro das Xornadas Europeas da Cultura Xudía que este ano teñen por lema “Diáspora”.  O alcalde de Tui, Enrique Cabaleiro, o concelleiro de Turismo, Laureano Alonso, e o historiador tudense, Suso Vila, foron esta mañá os responsables de dar a coñecer a programación prevista.

Un ano máis terá lugar en Tui o Festival de Bandas, que chega á súa XXVI edición. Será este sábado, 5 de agosto, na praza de San Fernando, ás 22h. Esta cita musical é un dos clásicos da programación de verán do Concello de Tui e contará nesta ocasión coa actuación da Banda de Música Popular de Tui e, como convidada, a Banda de Música Xuvenil de Xinzo.

Mañá xoves, 3 de agosto, ás 12h na sala de exposicións municipal na Área Panorámica terá lugar a inauguración da exposición “Rexas. Mulleres baixo o terror franquista”.  Esta mostra, promovida polo departamento de Cultura da Deputación de Pontevedra, busca contar a historia da represión rexistrada en Pontevedra tras o golpe de Estado de 1936 dende o punto de vista das mulleres. En doce paneis recóllese a historia de 172 veciñas da provincia, a quen deste xeito se lles rende unha homenaxe.

Este venres o cinema na rúa incluído na programación da Axenda Corredoira Cultural terá a súa segunda entrega. Será ás 22.15h na praza de San Fernando coa proxección da película “Los Pitufos. La aldea escondida”.

Nesta ocasión Pitufina e os seus irmáns están facendo sendeirismo no descoñecido Bosque Encantado, na procura dun lendario pobo. Os Pitufos teñen que conseguir ser máis rápidos que o malvado Gargamel mentres intentan manter a salvo os seus propios misterios.

Ante a celebración o sábado, 19 de agosto, da VII Festa Gastronómica, dentro do programa da Festa do Miño 2017 o concello de Tui convoca doce postos dobres para a venda directa e promoción do produto natural, autóctono e artesá.

O próximo martes, 25 de xullo, ás 21.30h celebrarase no Parque do Laxal en Rebordáns a XVIII Noite Internacional do Miño. Trátase dunha cita, plenamente consolidada, organizada pola Escola de Baile e Música San Fins de Rebordáns coa colaboración do Concello de Tui.  Este ano daranse cita neste evento grupos de Xeorxia, Letonia, Kenia e México amais dos propios organizadores pertencentes ao Centro Cultural San Fins de Rebordáns.