O próximo sábado 16 de agosto imos celebrar a XIII Festa Gastronómica na rúa Compostela, no tramo comprendido entre as rúas Ourense e Betanzos.  Este evento forma parte da programación de actividades da Festa do Miño 2025. 

As asociacións culturais de Tui que desexen participar deberán presentar a súa solicitude, cubrindo o Anexo I, xunto coa documentación requirida, o próximo luns 28 ou martes 29 de xullo. 

Medio centenar de persoas asistiron onte á tarde a conferencia sobre os 700 anos da peregrinación da Rainha Santa que ofreceu o historiador e membro do Instituto de Estudos Tudenses, Rafael Sánchez Bargiela, na igrexa de San Domingos.

Con este acto abriuse a programación “"Tui capital do  Camiño Portugués – cultura no camiño portugués" que prosegue até mañá venres.

Rafael Sánchez Bargiela afondou no percorrido que dende Coimbra realizou até Compostela a raíña Isabel de Aragón, viúva de Don Dinis, rei de Portugal, en 1325.

A festividade do apóstolo Santiago, este venres 25 de xullo, centra as actividades que o Concello de Tui organiza esta semana reivindicando o papel que a cidade de Tui desenvolve como “capital do Camiño Portugués a Santiago” que están a percorrer numerosos peregrinos nestas datas finais de xullo.

O Concello de Tui organiza nestas xornadas catro actividades que reivindican a condición xacobea da nosa cidade, a súa tradicional hospitalidade na acollida aos peregrinos así como a súa vocación cultural cunha oferta ampla e diversificada de actividades ao longo do ano-

Máis de medio centenar de persoas participaron onte luns no “Paseo literario polo corazón de Tui”, a primeira das visitas do programa “Coñece o noso patrimonio” organizado polo Instituto de Estudos Tudenses, coa colaboración do Concello de Tui.

A escritora e profesora Marga do Val guiou un percorrido por diversos lugares da memoria literaria tudense. Partindo dende a Alameda de San Domingos, abordou a vida e obra de poetas, novelistas e galeguistas que naceron, viviron en Tui ou tiveron unha conexión coa cidade.

O público respaldou a segunda fin de semana da programación de verán en Tui protagonizada polo humor e o cine na rúa.

O actor e humorista Pepo Suevos trouxo o humor a Tui o venres coa súa “Xira do cuarto de século” nun ateigado Espazo Sociocultural da rúa Camilo José Cela.

Con retranca e moita imaxinación, o humorista fixo un repaso polo ano 2007, non só da súa vida, senón tamén convidando ao público a participar no espectáculo. Tui foi así unha das 25 cidades onde fai parada Pepo Suevos con esta xira.

Humor e o cine para toda a familia na segunda fin de semana da programación cultural do verán organizada polo Concello de Tui.

Este venres, 11 de xullo, ás 22.30 h chega a Tui o actor e humorista Pepo Suevos co seu espectáculo “A xira do cuarto de século”. Unha xira especial onde rememora os seus 25 anos como humorista, e que fará parada en 25 cidades galegas, sendo Tui unha delas. 

Fin de semana de romaría e música tradicional a primeira do mes de xullo, que inaugurou a programación cultural do verán do Concello de Tui. 

Onte domingo o protagonista foi o Parque Natural Monte Aloia, onde multitude de persoas se congregaron para celebrar a Romaría das Angustias, como cada primeiro domingo de xullo, e a conmemoración este ano do 125 aniversario da Cruz do Aloia. 

Música, traxes e cultura tradicional protagonizan a primeira fin de semana deste mes de xullo en Tui co V Festival da Cultura Tradicional e Folk que organiza a Asociación Cultural San Telmo. 

O festival comeza este venres 4 de xullo coa inauguración da exposición “O traxe da muller aldeá” da man do grupo etnográfico Traxandaina. Trátase dunha valiosa mostra das roupas que vestían as mulleres aldeás, sobre todo, en Lugo, con elementos orixinais que se conservan até a actualidade. Estará aberta no Espazo Sociocultural da rúa Camilo José Cela até este domingo día 6. 

A aula da UNED de Tui acolle o curso de verán “La comunicación del cambio climático en España” entre o mércores 2 e o venres 4 de xullo. 

Durante tres xornadas, destacados relatores e expertos impartirán conferencias sobre a cobertura do cambio climático nos medios de comunicación españois, a súa evolución, a desinformación e sobre recursos enerxéticos. 

Este venres, ás 19 h inaugurarase na Sala de Exposicións Municipal, no edificio Francisco Sánchez, a mostra “Sobre la brevedad de la vida” de Xulio M. Sigüenza.

Nesta exposición, que se poderá visitar até setembro, o autor reflexiona sobre arte, memoria e existencia, o tempo e a súa expresión. A mostra recolle obras ou instalación realizadas por Xulio M. Sigüenza convidando a ollar os obxectos cunha nova perspectiva.