Mañá mércores, 29 de decembro, o Salón de Plenos da casa do concello de Tui acollerá ás 19.30 h a presentación do novo número da revista “Castellum Tyde” que edita o Instituto de Estudios Tudenses e que patrocina o Concello de Tui. Trátase da sétima entrega desta publicación periódica dedicada á investigación sobre a cidade de Tui e o seu territorio histórico.

O CRA Mestra Clara de Torres de Tui recibiu este mediodía a medalla de ouro do Concello de Tui en recoñecemento ao seu importante labor educativo ao longo das dúas últimas décadas. O salón de sesións acolleu o acto de entrega presidido polo alcalde, Enrique Cabaleiro, contando coa presenza da presidenta da Deputación, Carmela Silva, do xefe territorial de Educación da Xunta, César Pérez Ares,  do bispo da diocese Tui-Vigo, Luís Quinteiro Fiuza, e do presidente da Cámara de Valença, Jose Carpinteira xunto aos membros da corporación, a comunidade educativa e outras autoridades convidadas.

O próximo luns, 27 de decembro, ás 13 h no salón de sesións da casa do concello de Tui terá lugar o acto de entrega da medalla de ouro do Concello de Tui ao CRA Mestra Clara Torres. A concesión desta distinción foi acordada por unanimidade na sesión plenaria celebrada no mes de novembro do ano 2020.

Dado que os días 24 e 31 de decembro son hábiles a efectos administrativos, esta administración manterá aberta a oficina de asistencia en materia de rexistro en horario de 10:00 a 13:00 horas.

O rexistro electrónico está habilitado as 24 horas os 365 días do ano no seguinte enlace: https://concellotui.sedelectronica.gal/info.0

O Nadal é nacemento, o inicio dun tempo de esperanza no que florecen novas ilusións, e no que afloran valores tan nosos como a solidariedade e o altruísmo, valores que nos permitiron superar momentos moi difíciles.

Nestas datas amosemos o noso mellor sorriso a quen nos rodea, tendamos a nosa man amiga a quen nos necesita, e brindémoslle o noso afecto.

Iniciemos xuntos o Camiño do Nadal, o camiño que nos conduce pola senda da bondade, tecendo lazos e tendendo pontes de hospitalidade e irmandade.

Bo Camiño, Bo Nadal.

Este xoves, 23 de decembro, ás 12.00 horas, realizarase o acto de instalación da placa conmemorativa da denominación do Pavillón Deportivo Municipal, como Pavillón Deportivo Municipal Gustavo Rodríguez, tralo acordo plenario do Concello de Tui, de 30 de setembro, como mostra de recoñecemento polos méritos deportivos do deportista tudense.

No acto estarán presentes o alcalde de Tui, Enrique Cabaleiro, o concelleiro de Deportes, Rafael Estévez, o triatleta tudense Gustavo Rodríguez, acompañados polos concelleiros e concelleiras da corporación municipal de Tui.

O alcalde de Tui, Enrique Cabaleiro, vai participar mañá mércores na cidade de León na 58ª Asemblea Xeral da Red de Juderias de España – Caminos de Sefarad que reunirá a representantes de dezanove cidades das vinte unha que integran esta rede de municipios.

Neste Asemblea, que se desenvolverá no Hostal San Marcos de Léon, debateranse diversos temas, entre eles, a aprobación do orzamento e programa de actuacións para o vindeiro ano 2022, así como o deseño dun plan de estratexia de futuro da Red de Juderías para o período 2022-2025 como puntos máis destacados da orde do día.

Este sábado, 18 de decembro, terá lugar na aula da UNED, no antigo convento de San Domingos, unha Xornada Técnica en Igualdade e Comunicación organizada pola concellería de Igualdade o Concello de Tui que pecha a programación elaborada con motivo do 25N e ao abeiro do programa Maruxa Mallo, financiado pola Deputación de Pontevedra.

O novo convenio da Área de Rehabilitación Integral , ARI, do Concello de Tui, asinado o pasado día 1 en Santiago entre o  Ministerio de Mobilidade e Axenda Urbana, a Xunta de Galicia e o Concello de Tui permitirá por en marcha a 15º Fase de actuacións no Conxunto Histórico de Tui.

Nesta nova fase investiranse na rehabilitación de vivendas dentro da ARI 158.500 €, dos que o Goberno Central aporta 63.400 €, o Concello 20.500 € e a Xunta de Galicia 16.383 €. Os 58.217 € restantes corren a cargo dos beneficiarios das axudas.

No pleno ordinario da corporación municipal de Tui do 25 de novembro aprobouse inicialmente a ordenanza reguladora do estacionamento con horario limitado gratuíto (zona azul gratuíta). 

O texto da ordenanza exponse ao público por un prazo de 30 días, a contar dende o día seguinte á publicación deste anuncio no Boletín Oficial da Provincia, aos efectos de que as persoas interesadas poidan presentar as alegacións que consideren oportunas, en cumprimento do disposto no artigo 49 da Lei 7/1985, de 2 de abril, reguladora das bases de réxime local.