Tui prepárase para unha intensa fin de semana de San Telmo

Todo preparado en Tui para vivir a fin de semana grande das Festas de San Telmo, declaradas de Interese Turístico Galego. Unha ampla programación que inclúe deporte, concertos, verbenas, gastronomía, espectáculos para público familiar, animación de rúa... e moito máis até o luns 13, Luns de San Telmo, festivo local.

O Espazo Feiral, o paseo da Corredoira, o Teatro Municipal, o Espazo Sociocultural na rúa Camilo José Cela, a rúa Compostela, a praza de San Fernando e o barrio de San Bartolomeu son os principais escenarios das actividades previstas.

Espazo Feiral

Nestas Festas de San Telmo, o Espazo Feiral acolle diversos espectáculos e as casetas gastronómicas das asociacións culturais. Mañá sábado aquí actuará a orquestra La Banda de Ayer ás 22 h. Despois, o público poderá gozar de Tui Mix, unha sesión con El Virtual, Komojo, Overdose Records DJs con Kaixo, Wabii & Denzo e Xiari.

Tamén neste Espazo Feiral actuará o domingo a orquestra Panorama City, ás 23.30 h. O luns será a quenda da orquestra París de Noia, que actuará en dous pases: ás 19 h e ás 00 h.

Paseo da Corredoira

O paseo da Corredoira acollerá a Carreira Popular Solidaria II Memorial Xosé Martínez Tato, que terá lugar mañá sábado a partir das 11 h. No mesmo espazo, e amenizando a xornada, ás 12 h actuará a Charanga Cantos Somos. Xa pola tarde, o mesmo sábado, Pulpiño Viascón realizará un pasarrúas con “A Trikimachín”.

O domingo 12 as actividades neste espazo comezarán ás 12.30 h coa actuación da Banda de Música Municipal de Ribadumia e, ás 18 h será a quenda da Banda de Música Popular de Tui.

Xa ás 19 h do propio domingo haberá un pasarrúas de PistaCatro con “Mimo Circus Party” e ás 20 h actuará a Charanga Cantos Somos.

O luns, festivo local, o paseo da Corredoira acollerá ás 12.30 h o concerto da Banda Xuvenil de Tui.

Espazo Sociocultural da rúa Camilo José Cela

No Espazo Sociocultural da rúa Camilo José Cela actuará mañá sábado ás 18 h o mago tomiñés Samuel Moreno, co seu espectáculo “Etéreo” e, a partir das 21.30  h, actuará o grupo Ola de Calor.

Xa o domingo 12 ás 21.30 h o grupo The Sibaritas ofrecerá un concerto.

San Bartolomeu

Tui vivirá esta fin de semana unha nova edición da Concentración Cabalar de San Telmo, con diversas actividades durante os tres días: sábado, domingo e luns. O barrio de San Bartolomeu acollerá este tradicional evento con concursos de salto, de enganches, espectáculos e a segunda edición da Ruta Cabalar gratuíta, xunto ao espectáculo de Miron Bococi.

Teatro Municipal

O luns 13 ás 18 h o Teatro Municipal de Tui acollerá o concerto da Banda e Música da Escola Naval Militar de Marín, con entrada libre.

Rúa Compostela

A música volverá encher a rúa Compostela nestas festas patronais coas verbenas a cargo da orquestra Los Satélites, o domingo 12 ás 19.30 h en primeiro pase e ás 22 h en segundo.

Desfiles e procesións

Un dos elementos tradicionais destas festas son as procesións e os desfiles. O primeiro que percorrerá o centro da cidade, partindo dende a glorieta de Vigo, será o Desfile Exaltación de Traxes Tradicionais organizado pola Asociación do Traxe Tradicional de Tui. Será o domingo 12 ás 12.30 h.

O luns 13 ás 10.30 h terá lugar a Procesión pola Coronilla e Misa na Honra a San Telmo, na Catedral de Santa María de Tui.

O propio luns ás 19.15 h a Banda de Guerra e Guión da BRILAT desfilará dende a rúa Augusto González Besada até a praza de San Telmo, onde realizará a homenaxe aos confrades de San Telmo falecidos.

Ás 21 h partirá dende a Catedral a solemne Procesión de San Telmo que percorrerá as rúas de Tui, para ao regreso, na praza de San Fernando, realizar a ofrenda a San Telmo.

Xa ás 23.30 h, dende o Paseo Álvarez Blázquez, terá lugar a tirada de Fogos Piromusicais, como remate das festas de San Telmo 2026. Este ano coma novidade poderase baixar aos Xardíns de Troncoso.