O tudense Dámaso Rodríguez conecta Alcalá de Henares e Tui a través de distintas rutas xacobeas
Ten previsto chegar á cidade Tui a comezos de maio tras completar máis de mil quilómetros
A comezos do mes de maio chegará a Tui o tudense Dámaso Rodríguez tras completar “Cruzando Camiños” un percorrido no que a través de diversas rutas xacobeas conecta Alcalá de Henares e Tui. Dámaso Rodríguez é o presidente da Asociación de Amigos del Camino de Santiago Complutense de Alcalá de Henares (Madrid), neste percorrido une ambas localidades con séculos de pegadas peregrinas e un legado cultural e social que se entrelazan ao longo do tempo.
Para Dámaso Rodríguez Costas, cruzar os Camiños de Santiago Complutense, o de Madrid, o Francés e o Portugués, significa emprender unha travesía histórica e xeográfica, conectando os bispados de Alcalá e de Tui; a espiritualidade dos Santos Nenos Xusto e Pastor coa do neno San Paio e, a rica historia de Alcalá de Henares coa historia bimilenaria de Tui, a súa beleza medieval e reencontrarse coas súas raíces vitais. Ten previsto completar esta ruta entre o 9 e o 10 de maio, tras percorrer a pé mais de mil quilómetros que separan a ambas cidades.
Como “homo viator” e sempre peregrino xacobeo, Dámaso Rodríguez asume o reto de comunidade e destino evocando unha conexión espiritual e de reencontro a través do roteiro xacobeo, onde Alcalá é a súa orixe, a través do Camiño de Santiago Complutense e Tui, o seu destino, a través do Camiño de Santiago Portugués. Deste xeito conecta estas dúas localidades históricas.
Dámaso Rodríguez é autor do libro “Ruta jacobea, camino y leyenda", presentado en Tui en novembro de 2021, e de varias reportaxes dos máis importantes camiños xacobeos que ten percorrido ao longo da súa vida.
A concelleira de Turismo e Patrimonio, Ana Núñez, destaca que esta iniciativa de Dámaso Rodríguez conecta a dúas localidades históricas e patrimoniais e contribúe á súa promoción e difusión.