Convocatoria e bases do proceso de selección para a contratación laboral temporal a tempo parcial dun auxiliar administrativo

DONA CEFERINA SAA RODRIGUEZ, SECRETARIA ACCTAL DO CONCELLO DE TUI,

CERTIFICA: Que por parte desta Alcaldía, con esta mesma data, dictouse a seguinte Resolución:

RESOLUCIÓN DA ALCALDÍA

CONVOCATORIA E BASES DO PROCESO DE SELECCIÓN PARA A CONTRATACIÓN LABORAL TEMPORAL A TEMPO PARCIAL DUN AUXILIAR ADMINISTRATIVO.

 

En virtude das facultades que me confire a vixente lexislación en materia de Réxime local:

RESOLVO: Aprobalos seguintes criterios para a contratación laboral temporal dun Auxiliar Administrativo, para o Concello de Tui.

 

1.- OBXECTO DA CONVOCATORIA:

O obxecto das presentes bases é proceder á selección dun AUXILIAR ADMINISTRATIVO para a súa contratación laboral temporal  a tempo parcial polo Concello de Tui, e xustificado na providencia de Alcaldía de data 25 de agosto de 2010. A persoa contratada deberá presta-los seus servicios, a tempo parcial durante 20 horas semanais, en horario a determinar según as necesidades do servizo, prestando o servizo en réxime de flexibilidade horaria (xornada de mañá, ou de tarde), como consecuencia da adaptación as especiais característica do departamento a que se adscriba, así como das esixencias que veñan impostas pola propia natureza das funcións a desenvolver.

A retribución bruta total mensual será de 450,33 euros incluindo salario e prorrateo de pagas extra.

O contrato de traballo sera temporal de duración determinada na modalidade de obra ou servizo determinado e terá como data de finalización o 31 de decembro de 2010.

 

2.- REQUERIMENTOS DOS ASPIRANTES:

1.- Ter nacionalidade española, sen prexuizo do disposto no artigo 57 da Lei 7/2007, de 12 de abril.

2.- Posuir capacidade funcional para o desempeño das tarefas.

3.- Ser maior de dezaseis anos, e non exceder da idade máxima de xubilación forzosa.

4.- Non ter sido separado mediante expediente disciplinario do servicio de calquera das Administracións Públicas, órganos  constitucionais ou estatutarios das Comunidades Autónomas,  nin atoparse inhabilitado para o exercicio de funcións públicas de conformidade co disposto no artigo 56.1 da Lei 7/2007. de 12 de abril.

5.- Posuir a titulación esixida:graduado en educación secundaria obrigatoria ou titulación equivalente.

6.- Ter ingresado na conta da Tesourería do Concello de Tui, durante o prazo de presentación de instancias o importe en concepto de dereitos de exame segundo o disposto na ordenanza reguladora correspondente.

 

3. PROCESO DE SELECCIÓN :

O proceso de selección será o de oposición e consistirá na realización das seguintes probas, que se realizarán na mesma sesión:

 

3.1- Primeiro exercicio: Obrigatorio e eliminatorio de carácter teórico.

Consistirá en contestar por escrito a unha serie de preguntas ou a un cuestionario tipo test, de preguntas con respostas alternativas baseadas no contido do programa establecido no anexo I da convocatoria durante un periodo de tempo que será determinado polo tribunal antes do inicio deste exercicio. Este exercicio cualificarase de 0 a 10 puntos, sendo necesario para superalo un mínimo de 5 puntos.

3.2- segundo exercicio: Obrigatorio e eliminatorio de carácter práctico.

Consistirá nunha proba de coñecemento práctico a nivel de usuario de entorno operativo Windows, sobre o manexo de ferramentas de ofimática básica, utilizando software libre (tratamento de textos, folla de cálculo ou bases de datos), a elección do tribunal e no tempo que este determine. Este exercicio terá carácter eliminatorio e puntuarase de 0 a 10 puntos, quedando eliminados todos aqueles aspirantes que non acaden un mínimo de 5 puntos.

 

3.3-Terceiro exercicio (obrigatorio e non eliminatorio).- Este terceiro exercicio, consistirá na traducción dun texto de castelán a galego ou de galego a castelán, determinado polo tribunal inmediatamente antes da realización do mesmo e que puntuaráse de 0 a 3, sendo este exercicio de carácter obrigatorio pero non eliminatorio.

 

Estarán exentos da realización deste exercicio os aspirantes que acrediten posuir o Celga 2 ou equivalente debidamente homologado polo órgano competente en materia de política lingüística da Xunta de Galicia, de conformidade co establecido na Orde da Consellería de Presidencia, Administracións Públicas e Xustiza do 16 de xullo de 2007 pola que se regulan os certificados oficiais acreditativos dos niveis de coñecemento da lingua galega, aos que se lles asignarán os 3 puntos. Aos efectos de quedar exentos da realización desta proba os aspirantes achegarán xunto coa instancia, copia cotexada do certificado oficial acreditativo do nivel Celga 2 de coñecemento da lingua galega aos cales se lles asignará nesta proba 3 puntos.

 

4. PRESENTACIÓN DE SOLICITUDES

As solicitudes para a participación no presente proceso selectivo presentaranse no Rexistro Xeral do Concello de Tui ou en calquera das formas prevista no artigo 38.4º da Lei 30/92, de 26 de novembro, de Réxime Xurídico das Administración Públicas e Procedemento Administrativo Común, no prazo de 5 días hábiles dende o día seguinte ó da publicación da convocatoria nun xornal de difusión provincial. No suposto de presentarse a instancia fora do Rexistro Xeral do Concello, será necesario remitila por Fax ao nº 986 60 41 48, o mesmo día da súa presentación, para que sexan incluidos na lista de admitidos. Xunto á instancia achegáranse os seguintes documentos:

 

    *-Fotocopia do DNI.

 *Copia do xustificante de ter aboado os dereitos de exame.

 *Copia cotexada do certificado oficial acreditativo do nivel Celga 2 de coñecemento da lingua    galega, aos efectos de quedar exento da realización da proba de galego.         

 

Rematado o prazo de presentación de solicitudes, o Sr. Alcalde, no prazo máximo de 1 mes, mediante resolución aprobará a lista provisional de admitidos e excluídos. Dita resolución será definitiva de non haber excluídos, e será exposta no taboleiro de anuncios do Concello, así como na páxina web do mesmo ( http://www.concellotui.org/ ), relacionándose os aspirantes excluídos coa indicación da causa de exclusión. Nesta resolución incluirase a composición do tribunal, o lugar, a data e a hora de realización dos exercicios.

Os aspirantes excluídos disporán dun prazo de tres días hábiles para reclamacións e corrección das deficiencias sinaladas. Estas reclamacións e correccións serán aceptadas ou rexeitadas na resolución que aprobe a lista definitiva, que publicarase na mesma forma. Contra a resolución na que se declare a exclusión definitiva do aspirante, poderá interpoñerse potestativamente recurso de reposición, no prazo dun mes, ante o órgano que dictou o acto, ou directamente recurso contencioso-administrativo no prazo de dous meses, ante a Xurisdicción Contenciosa-Administrativa, contados a partir do día seguinte da publicación no Taboleiro de anuncios do Concello de Tui.

 

 5. SELECCIÓN DOS CANDIDATOS

Rematado o prazo de presentación de instancias o Tribunal formado como prescribe o artigo 60 da Lei 7/2007 de 12 de abril, procederá a efectua-la selección conforme se describe no punto 3º destas bases.

Os membros do tribunal deberán absterse de intervir, notificándoo á autoridade convocante, cando neles concorran circunstancias das previstas no artigo 28 da Lei 30/1992, de Réxime Xurídico das Administracións Públicas e do procedemento administrativo común. Os aspirantes poderán recusar aos membros do tribunal cando se dean calquera das citadas circunstancias.

O tribunal non se poderá constituír nin actuar sen a asistencia de máis da metade dos seus membros, titulares ou suplentes indistintamente, debendo estar presente en todo caso,o Presidente e o Secretario ou quen legalmente os sustitúa.

Os membros concorrentes ás sesións do Tribunal e para os efectos de percepcián de asistencias se clasificarán consonte o disposto no artigo 33 do Real Decreto 462/2002 sobre indemnizacións por razón de servicio.

O tribunal na súa actuación axustarase ao establecido nas presentes bases; no non disposto, seralle de aplicación á normativa prevista para a formación da vontade dos órganos colexiados, tanto na lei 30/1992 do 26 de novembro como na demais normativa de aplicación.

 Rematado o proceso de selección o Tribunal aprobará a relación de aspirantes en orde de maior a menor puntuación e propondra o Sr. Alcalde para a súa contratación á persoa que encabece a relación do proceso selectivo.

No prazo de cinco días hábiles contados a partir do seguinte ó da publicación no Taboleiro de Edictos do Concello da relación, o aspirante proposto deberán presenta-la documentación acreditativa dos requisitos sinalados nestas Bases para acceder ó posto de traballo, así como realizar o preceptivo curso de prevención de riscos laborais, perdendo os seus dereitos se así non o fixera.

No caso de que a persoa seleccionada non reunise os requisitos necesarios para a contratación poderá ser substituída pola seguinte da relación do proceso selectivo, situación que tamén poderá suceder  no caso de ser necesario cubrir algunha praza por razóns de baixa, enfermidade, etc. utilizando para iso a modalidade de contratación laboral apropiada para cada caso.

 

No caso de quedar deserto o proceso selectivo por non superar ningún aspirante a proba ou por non presentarse ningún a esta, o Sr. Alcalde queda autorizado a convocalo novamente cantas veces fose necesario, de conformidade coas presentes bases.

 

6.- INTERPRETACIÓN DAS BASES.

O Tribunal queda autorizado para resolver las dúbidas que se presenten e adoptalos acordos necesarios para a boa orde do proceso selectivo en todo o non previsto nestas bases.

 

7.- RECURSOS.-

Os/as interesados/as poderán impugnala presente convocatoria e as súas bases, así como tódolos actos administrativos que se derivan da mesma nos casos e na forma establecidos na Leí de réxime xurídico das Administraciáns Públicas e do Procedemento Administrativo Común.

 

ANEXO I: TEMARIO

PARTE XERAL

 

Tema 1.- A Constitución española de 1978. Estructura. Contidos.Principios Xerais.

Tema 2.- Os dereitos e deberes fundamentais. Garantías. O Defensor do Pobo. O Tribunal Constitucional. A reforma da Constitución.

Tema 3.- A Coroa. O Poder Lexislativo. Composición, atribucions e funcionamento.

Tema 4.- O Goberno e a Administración do Estado. Relacions entre o Goberno e as Cortes Xerais.

Tema 5.- O Poder Xudicial.

Tema 6.- A Organización territorial do Estado. As Comunidades Autónomas. Os Estatutos de Autonomía. A Administración Local na Constitución.

Tema 7.- A Comunidade Autónoma de Galicia. O Estatuto de Autonomía. O parlamento. A Xunta e o seu Presidente.

Tema 8.- O acto administrativo. Conceptos. Clases. Elementos. Motivación e notificación. Eficacia e validez do acto administrativo.

Tema 9- Invalidez do acto administrativo. Nulidade de pleno dereito e anulabilidade. A execución dos actos administrativos.

Tema 10- O procedemento administrativo. Significado. Principios xerais. Fases do procedemento. Recursos administrativos: concepto e clases.

 

PARTE ESPECÍFICA

 

Tema 1.-O réxime local español. Entidades que integran a administración local española.

Tema 2.- O municipio. Concepto e elementos. O termo municipal. A organización municipal. A poboación.

Tema 3.- Funcionamento dos organos colexiados locais.Actas e certificación de acordos.

Tema 4.- Outras entidades locais. Comarcas, Mancomunidades, Areas Metropolitanas e Entidades locais de ambito inferior ao municipio.

Tema 5.-Ordenanzas e regulamentos das entidades locais. Clases. Procedemento de elaboración e aprobación.

Tema 6.-A función pública local.

Tema 7.- As Facendas Locais. Orzamento das Corporacións Locais. Contido, elaboración e aprobación. Os Recursos das Entidades Locais.

Tema 8.- Os bens das Entidades Locais. Concepto, clasificación e regulación.

Tema 9.-Os contratos administrativos na esfera local. Concepto, clasificación e regulación.

Tema 10.-O rexistro de entrada e de saida de documentos. Requisitos de presentación de documentos. Comunicacións e notificacións

 

      E para que así conste, expido a presente, de orde e co visto e prace do Sr. Alcalde, en Tui, a dez de setembro de dous mil dez.

 

Visto e Prace

O ALCALDE