Tui prepárase para unha intensa fin de semana de San Telmo

Todo preparado en Tui para vivir a fin de semana grande das Festas de San Telmo, declaradas de Interese Turístico Galego. Unha ampla programación que inclúe deporte, concertos, gastronomía, verbenas, espectáculos para público familiar, animación de rúa... e moito máis até o luns 28, festivo local. O paseo da Corredoira, o Espazo Feiral, o Teatro Municipal, o Espazo Sociocultural da rúa Camilo José Cela, a rúa Compostela, a praza de San Fernando, San Bartolomeu... son os principais escenarios das actividades previstas.

Espazo Feiral

Nestas Festas de San Telmo, o Espazo Feiral, na confluencia da rúa Mártires de Sobredo e a avenida da Concordia, acolle diversos espectáculos, as casetas gastronómicas das asociacións culturais e as atraccións das festas. Mañá sábado aquí actuará a orquestra Olympus cun primeiro pase ás 21 h e o segundo ás 23 h. Despois, o público poderá gozar de Tui Mix, unha sesión con dj Enter e dj Bacardit.

Tamén neste Espazo Feiral actuará o domingo a orquestra Kubo, ás 21 h e ás 00 h.

Corredoira

O paseo da Corredoira acollerá a Carreira Popular I Memorial Xosé Martínez Tato, que terá lugar mañá sábado a partir das 11 h coa participación de 850 persoas nas distintas categorías. No mesmo espazo, e amenizando a xornada, ás 12 h actuará a Charanga Cantos Somos. Xa pola tarde, o mesmo sábado, Barafunda realizará un pasarrúas con “Tucáns”.

O domingo 27 as actividades neste espazo comezarán ás 12 h coa actuación da Charanga A tu Ritmo e, ás 20 h, será a quenda da Charanga Cantos Somos. Dous pasarrúas teremos na Corredoira o domingo: ás 18 h Mariposas Hípicas Celta e ás 19 h Troula Animación presentará “Psichodelia”.

 

Tamén o  domingo 27 na Corredoira, ás 12.30 h, estará en concerto o Ateneo Musical de Bembrive e ás 18 h, actuará a Banda de Música Popular de Tui.

Xa o luns, festivo local, o paseo da Corredoira acollerá o pasarrúas “Gala” de Asacocirco.

Espazo da rúa Camilo José Cela e

No novo Espazo Sociocultural da rúa Camilo José Cela actuará mañá sábado ás 18 h Brais das Hortas co seu “Concertasso na Horta” e, a partir das 21.45 h, actuará o grupo Wondercovers.

O domingo 27   ás 21.45 h, estará en concerto o grupo Old Bridge.

O luns 28 ás 12.30 h será a quenda da Banda Xuvenil de Tui. Xa pola tarde, ás 17 h, os Xigantes e Cabezudos tomarán a praza da Inmaculada xunto ao grupo de gaitas Lembranzas da Terra.

Teatro Municipal

O luns 28 ás 18 h o Teatro Municipal de Tui acollerá o concerto da Banda e Música da Escola Naval Militar de Marín, con entrada libre.

San Bartolomeu

Tui vivirá esta fin de semana unha nova edición da Concentración Cabalar de San Telmo, que amplía a súa duración a tres días: sábado, domingo e luns. O barrio de San Bartolomeu acollerá este tradicional evento con novidades este ano na súa programación, como a Ruta Cabalar Gratuíta.

Rúa Compostela

A música volverá encher a rúa Compostela nestas festas patronais coas verbenas a cargo de Los Players, o domingo 27, ás 19 h e ás 23 h; e o luns con Los Satélites, ás 19 h e ás 00 h.

Desfiles e procesións

Un dos elementos tradicionais destas festas son as procesións e os desfiles. O primeiro que percorrerá o centro da cidade, partindo dende a glorieta de Vigo, é o Desfile Exaltación de Traxes tradicionais organizado pola Asociación do Traxe Tradicional de Tui. Será o domingo 27 ás 12.30 h.

O luns 28 ás 11 h terá lugar a Procesión pola Coronilla e Misa na Honra a San Telmo, na Catedral.

O propio luns ás 19.15 h a Banda de Guerra e Guión da BRILAT desfilará dende a rúa Augusto González Besada até a praza de San Telmo, onde realizará a homenaxe aos confrades de San Telmo falecidos.

Ás 21 h partirá dende a Catedral a solemne Procesión de San Telmo que percorrerá as rúas de Tui, para ao regreso, na praza de San Fernando realizar ofrenda a San Telmo.

Xa ás 23.30 h, dende o Paseo Álvarez Blázquez, terá lugar a tirada de Fogos Piromusicais, como remate das festas de San Telmo 2025.