“Contacontos de libros contentos” é o título do contacontos que Carmen Domech achega este mércores, 13 de outubro, ás 18 h á Biblioteca Pública Municipal de Tui. Esta actividade forma parte do programa do Mes da Biblioteca que comezou o pasado 22 de setembro e continuará até  o 25 deste mes.
O contacontos destes mércores vai dirixido especialmente a nenos e nenas de 4 a 11 anos. Nesta sesión Carmen Domech exporá as cousas fantásticas que contan os libros, sucesos incribles de libros tímidos, divertidos, intrépidos, deliciosos…

Hoxe, 7 de outubro, conmemórase o 450 aniversario da Batalla de Lepanto. Aproveitando esta efeméride o Concello de Tui organiza un ciclo de conferencias e unha serie de visitas guiadas ao retablo de Nosa Señora do Rosario ou da batalla de Lepanto, e a igrexa de San Domingos onde está ubicado, para poñer en valor este singular elemento do patrimonio cultural tudense, e contribuír ao coñecemento da nosa historia e de acervo cultural de Tui.

A Compañía Eléctrica presenta este venres, ás 19.30  h, no Teatro Municipal de Tui a súa ópera prima “Aibō”. É unha peza teatral recomendada para público infantil de 3 a 6 anos. Trátase dunha visión diferente do conto popular da Carapuchiña Vermella aportando unha ollada positiva da nosa relación coa natureza, e sobre o trato  que temos con outros seres diferentes a nós.  Sobre o escenario estarán Iria Piñeiro e Areta Bolado con música de Paulo Pascual. Aibō significa compañeira en xaponés, sendo esta a palabra que mellor se axusta para definir esta fábula.

A Biblioteca Pública Municipal de Tui continua desenvolvendo a súa programación de actividades do “Mes da biblioteca” cunha nova sesión de contos para os usuarios máis cativos deste centro bibliotecario. Así este mércores, 6 de outubro, ás 18 h presenta o espectáculo “Pes de lobo. Un lobo na biblioteca” a cargo do narrador oral Anxo Moure. Esta actividade está dirixida especialmente aos nenos e nenas con idades entre 4 e 11 anos de idade.

Esta fin de semana comeza a I Feira da Cabaza que ao longo de todo o mes de outubro se vai celebrar no municipio tudense.

A Oficina de Turismo acolleu esta mañá a presentación a cargo do alcalde, Enrique Cabaleiro, as concelleiras de Comercio, Ana Mª Núñez, e de Cultura, Sonsoles Vicente, Carlos Picho, Juan Carlos Boo e Telmo Alfaya, membros da organización e José Martínez Tato, presidente do club AndaTui.

O espectáculo de danza contemporánea “Bailar agora” de Marta Alonso abre mañá a programación do outono no Teatro Municipal de Tui.   A función comezará ás 21.30 h tendo lugar a apertura de portas ás 21 h. As entradas pódense mercar en www.tui.gal até mañá venres ás 20.30 h. Teñen un prezo de 8€, e 6€ para público infantil e as persoas que teñan dereito a algún dos descontos establecidos.

Mañá xoves, 30 de setembro, ás 12.15 h na Oficina de Turismo, na praza de San Fernando, terá lugar a presentación da Feira da Cabaza que se vai celebrar no mes de outubro en Tui.

A presentación correrá a cargo do alcalde de Tui, Enrique Cabaleiro, das concelleiras de Comercio, Ana Mª Núñez, e de Cultura, Sonsoles Vicente, xunto a Juan Carlos Boo e Telmo Alfaya membros da organización.

Este venres, 1 de outubro, comeza no Teatro Municipal de Tui, a programación Cultural de Outono conformada por dez espectáculos de danza, teatro e música dirixidas tanto a público adulto coma infantil.

A presentación desta programación tivo lugar esta mañá na casa do concello a cargo do alcalde de Tui, Enrique Cabaleiro, da concelleira de Cultura, Sonsoles Vicente, e do director da Axencia Galega das Industrias Culturais, Jacobo Sutil.

A Biblioteca Pública Municipal de Tui avanza na súa programación de actividades cunha sesión de contos para os usuarios máis cativos deste centro bibliotecario. Así este xoves, 30 de setembro, ás 18,00 horas chega ao centro bibliotecario o espectáculo “Levántate Xan, contos para bebés” de Caxoto. Trátase dunha sesión multidisciplinar na que, a través da palabra, da música en directo, do xogo e da complicidade das familias, lévase ás crianzas a unha aprendizaxe do mundo animal, da lingua e dos sons.

Mañá mércores, ás 10.45 h, na sala de reunións da casa do concello de Tui terá lugar a presentación da programación cultural de Outono que se vai celebrar no Teatro Municipal dende este venres, 1 de outubro, até o venres 3 de decembro.

A programación correrá a cargo do alcalde de Tui, Enrique Cabaleiro; da concelleira de Cultura e Ensino, Sonsoles Vicente, e do director da AGADIC, da Axencia Galega das Industrias Culturais, Jacobo Sutil.