Tui conta cunha longa tradición industrial e comercial, cunha importante actividade dende inicios do século XX, marcada en boa parte polas relacións comerciais con Portugal. Na actualidade a cidade mantén esa tradición cunha presenza de comercios de diversos sectores, ao que se suma a existencia, no Parque Empresarial de Areas, dun centro comercial Outlet. Semanalmente, os xoves, celébrase un mercado nas rúas novas e no Paseo da Corredoira. Tamén o Mercado de Abastos rexistra unha importante actividade sendo os días prinicipais os xoves e os sábados.
Do 1 ao 17 de abril celebrarase en Tui a Festa do Meixón. A nova edición deste evento gastronómico volverase a celebrar en distintos restaurantes da cidade: Asador Paulo, El Molino, El Niño Trasto , Emma Tapas&Brunch, La de Manu, O Novo Cabalo Furado e Parador de Tui. As racións do meixón do Miño terán un prezo de 79 euros, previa reserva.
Esta é a relación dos restaurantes participantes na Festa do Meixón 2023
Mañá ás 12.30 h será inaugurada no Claustro da Catedral de Tui a VIII Mostra da Camelia organizada por ATUCA, Amigos Tudenses da Camelia, coa colaboración do Concello de Tui entre outras entidades. O lema deste ano é “A Camelia na Eurocidade”. Acudirán 80 expositores de Galicia, Asturias e Portugal que amosarán unha ampla mostra desta flor e das distintas variedades.
Coincidindo coas festas de Nadal o Concello de Tui organiza un Mercado de Nadal no Paseo da Corredoira centrado en produtos de Nadal, agasallos, decoración, e artesanía.
En 2023, tras o éxito de anos anteriores e ao igual que se fixo en 2022, celebrarase durante un mes. Será entre o entre o venres 1 de decembro de 2023 e o martes 5 de xaneiro de 2024..
Os postos distribúense en casetas de madeiras decoradas e iluminadas, no Paseo da Corredoira, que se converten nun magnífico escaparate para o produto artesá galego.
A transformación, modernización e dixitalización do comercio local, tanto do sedentario coma do mercado semanal dos xoves, e a reforma integral da praza de abastos será unha realidade grazas á execución do proxecto que comezará en breve e que deberá estar rematado o 30 de xuño de 2024. Contará cun investimento de 1,6 millóns de euros dos que o Ministerio de Industria, Comercio e Turismo aportará 1,3 millóns de euros.
O alcalde de Tui, Enrique Cabaleiro, recibirá o próximo luns, 30 de xaneiro, ás 12 h na casa do concello á secretaria de Estado de comercio, Xiana Méndez. Manterán unha reunión de traballo, na que participarán tamén membros da corporación, e a secretaria de Estado asinará no libro de honra do Concello.
A continuación realizarán un paseo polo centro urbano visitando a zona comercial e o mercado municipal.
Un total de 128 vendedores e vendedoras ambulantes solicitaron a renovación da autorización dos seus postos no Mercado semanal dos xoves en Tui. O pasado día 10 de xaneiro rematou o prazo para realizar esta solicitude que arestora está en tramitación. Das 128 solicitudes rexistradas 27 corresponden a postos de alimentación.
O Mercado Municipal de Tui, situado na rúa Maristas, será obxecto dunha reforma integral coa finalidade de mellorar tanto as instalacións coma a experiencia de compra no mesmo de cara a lograr o recoñecemento coma Mercado Excelente.
O Concello de Tui elaborou un ambicioso proxecto no que se aposta non só por esta reforma integral da praza de abastos, senón tamén pola dixitalización e revitalización do comercio local e do mercado semanal dos xoves.
Os e as praceiras do Mercado Municipal de Tui participaron nas últimas semanas nun programa de formación e mentorización levado a cabo polo Concello de Tui, a través da concellería de Comercio e Mercados. O obxectivo do concello de Tui con esta acción formativa é seguir avanzando pasos no camiño inicio para lograr o recoñecemento da praza tudense coma Mercado Excelente. Máis aló deste programa tamén se levou a cabo a redacción do proxecto para a reforma integral do edificio.
Novas propostas para cociñar este Nadal chegarán este sábado ao Mercado Municipal de Tui da man do tudense Miguel Rodríguez, chef do Parador de Baiona e coordinador da cociña no Parador de Tui. Será dentro dos Obradoiros de Cociña de Nadal que organiza a concellería de Comercio.
Nesta ocasión Miguel Rodríguez ensinará, na praza de abastos, coma elaborar unha crema de marisco, ovo poché, empanadilla crocante e biscoito coma aperitivo, e peixe de mercado envolto en algas sobre cogomelos e ovas de peixe voador.
A entrada é de balde, e non é preciso reserva previa.
A maxia do Nadal inundará a partir do luns, 5 de decembro, o Paseo da Corredoira de Tui. Até o 5 de xaneiro este céntrico emprazamento acollerá o Mercado de Nadal organizado polo Concello de Tui. Artesanía, gastronomía, produtos de agasallo, decoración…todos vinculados ao Nadal e elaborados artesanalmente ocuparán as dez casetas de madeira, coidadosamente decoradas e iluminadas, que acollerán a trintena de postos que participarán nesta actividade durante as catro quendas establecidas.
