Tui ten unha clara vocación turística. A súa situación e os seus recursos naturais e patrimoniais constitúen un valor en alza. O conxunto histórico, o Camiño Portugués, o Parque Natural do Monte Aloia, o río Miño, a ruta xudía, a Eurocidade...son os eixos principais desta área. O Turismo amosase cada vez máis coma un dos principais recursos cos que contará Tui no futuro. A promoción é xa un eixo fundamental no desenvolvemento dun sector, que lentamente vai creando traballo e oportunidades na cidade. Unha tarefa na que todos deberemos implicarnos, por suposto o Concello como xestor pero tamén as empresas e os profesionais do sector.
A Oficina Municipal de Turismo de Tui rexistrou un notable aumento na afluencia de visitantes durante o pasado mes de novembro, atendendo a un total de 1.166 persoas, unha cifra que supón un incremento do 78% respecto ao mesmo mes do ano 2023, cando se contabilizaron 652 visitantes.
Tui acenderá este sábado, 30 de novembro, ás 18.30 h o seu Nadal. Será co simbólico acto de acendido do alumeado de Nadal que se desenvolverá na praza da Inmaculada. Máis de 506 mil bombillas led e máis de 4 mil metros de elementos luminosos encherán de luz e de cor das rúas e prazas da cidade para vivir un Nadal cheo de maxia. O acendido das luces contará coa banda sonora do Coro Infantil de Pazos de Reis que interpretará composicións propias destas datas enchendo de música a Praza da Inmaculada.
Tui dinamizará a súa programación de Nadal este ano cun espazo único e inesquecible: O Taller Máxico de Papá Noel, un espazo que transformará o edificio dos antigos xulgados, na Praza da Inmaculada, dende o 30 de novembro até o 5 de xaneiro. Este lugar máxico converterá a cidade nun verdadeiro conto de Nadal, ofrecendo diversión e solidariedade tanto para pequenos coma para maiores.
Tui será a sede de Congreso de Fantasía,Ciencia Ficción e Terror do estado español, Hispacon, no último cuadrimestre 2026. Así o designou hai un días a asemblea xeral de Pórtico, a Asociación Española de Fantasía, Ciencia Ficción e Terror, tras a proposta realizada pola escritora tudense de xénero fantástico Conchi Regueiro, que obtivo o respaldo da maioría das persoas participantes na asemblea. O Concello de Tui colaborará coa organización deste evento.
Tui avanza na desestacionalización do turismo consolidándose coma un destino turístico atractivo ao longo de todo o ano, tal e coma reflicten os datos da Oficina Municipal de Turismo referidos ao pasado mes de outubro.
Así, durante o pasado mes de outubro, a Oficina de Turismo rexistrou un incremento dun 57% no número de persoas, turistas e peregrinos, que solicitaron información con respecto ao mesmo mes do ano anterior, pasando das 1.497 persoas en outubro de 2023 ás 2.353 deste ano.
Tui é protagonista da serie documental “Caminos de Sefarad, diario dunha ciclista II” que se estrea este domingo, 6 de outubro, ás 12 h en La2 de TVE.
Tui consolidouse en setembro coma o principal punto de inicio do Camiño Portugués a Santiago, foi amais o segundo lugar de partida de todas as vías xacobeas. Máis de seis mil persoas elixiron a cidade para iniciar esta ruta xacobea o mes pasado. Estas cifras – tanto no cómputo de peregrinos e peregrinas que realizaron o Camiño Portugués coma os que saíron de Tui – incrementáronse nun 12% con respecto a setembro de 2023.
Un milleiro de persoas participaron ao longo do mes pasado nas actividades desenvolvidas ao abeiro do programa “Setembro Xudeu” que consolidaron á cidade coma destino cultural de referencia. Así o indica a concellería de Turismo e Patrimonio do Concello de Tui, Ana Núñez, que expresa a súa satisfacción polo balance extraordinariamente positivo do desenvolvemento destas actividades programas arredor do “Setembro xudeu en Tui” cunha ducia de actividades que contaron cunha ampla participación tanto de tudenses como de visitantes.
A programación do Setembro Xudeu en Tui remata esta fin de semana pechando a oferta de actividades desenvolvidas ao longo deste mes que contaron cunha moi boa acollida. Un xogo de escapismo ao aire libre, a derradeira visita guiada e as xornadas gastronómicas son as citas desta fin de semana.
Así hoxe sábado, ás 18 h, diante da Oficina de Turismo comezará o xogo de escapismo sobre a “A comunidade xudía de Tui” que levará as persoas participantes a unha emocionante aventura polas rúas do centro histórico seguindo as indicacións e pistas para ir resolvendo os diferentes desafíos.
A cidade de Tui será o escenario dun xogo de escapismo sobre “A comunidade xudía de Tui” que terá lugar este sábado, 28 de setembro. Comezará ás 18 h inicio diante da Oficina Municipal de Turismo no céntrico Paseo da Corredoira. Esta actividade forma parte da programación do “Setembro xudeu en Tui”.
