Máis de medio centenar de nadadores na II Travesía a Nado Eurocidade 2012

O pasado sábado disputouse a II Travesía a Nado Eurocidade 2012, proba deportiva organizada pola Cámara Municipal de Valença, o Concello de Tui e o Clube de Actividades Acuáticas Alto-Baixo Miño.

Os nadadores participantes concentráronse na praia da Mariña de Tui e, tras realizar as inscricións e recoller un gorro de natación patrocinado pola marca deportiva ARENA, foron trasladados en autobús e nos barcos da organización ata o Cais de Valença, lugar da saída da proba.

Tras percorrer os máis de 900 metros de distancia desta segunda edición, os nadadores foron chegando á praia da Mariña, onde foron aclamados polo numeroso público que animou a proba. Os participantes recibiron unha camiseta conmemorativa do evento, así como unha bolsa de avituallamento para recuperar as forzas gastadas.

Unha vez terminada a proba, o Presidente da Cámara de Valença, Jorge Mendes, o Vereador de Deportes da Cámara de Valença, José Monte, e o Concelleiro de Deportes de Tui, Nicolás Lorenzo, fixeron entrega de un agasallo á nadadora máis veterana, así como á máis nova, rematando o evento cunha fotografía con todos os participantes, así como cos colaboradores.

Dende o Concello de Tui e a Cámara de Valença quérese felicitar ao Clube de Actividades Acuáticas Alto-Baixo Miño pola boa organización desta segunda edición, así como a todos os seus colaboradores. Agradecer tamén a colaboración de Protección Civil de Tui, dos Bombeiros Voluntarios de Valença, de Radio Municipal de Tui, así como da marca deportiva ARENA polo seu patrocinio.

Máis fotografías en www.tuigrafico.com