Contraproduccións, Rilo e Penadique, Roi Borrallas, Gramola Gominola e Con de tres pés actuarán no Teatro Municipal de Tui nos meses de febreiro e marzo. As funcións terán lugar cada venres e inclúen tamén a proxección de “O corno” de Jaione Camborda.

Esta nova programación está  formada por un total de seis espectáculo dirixidos tanto a público adulto coma familiar. As entradas están xa á venda a través de tui.gal e poderán adquirirse até 10 minutos antes do inicio da cada función.

Mañá xoves abre o prazo de inscrición para o XXXV Concurso Desfile de Entroido que se vai celebrar o Martes de Entroido, 13 de febreiro. Poderán participar comparsas, cun mínimo de 30 persoas disfrazadas, e grupos formados por entre 10 e 20 persoas.

A inscrición debe realizarse presentando a solicitude, e a documentación requirida, na sede electrónica do Concello de Tui.  As comparsas non poderá ocupar máis de 120 metros de longo. As carrozas terán coma medidas máximas 4 metros de alto, 3 metros de ancho e 12 metros de longo.

A camelia será protagonista da fin de semana en Tui coa celebración da IX Mostra da Camelia Cidade de Tui no Claustro da Catedral. O Concello de Tui colabora un ano máis neste evento organizado por ATUCA, Amigos Tudenses da Camelia.

Mañá sábado, ás 12.30 h, terá lugar a inauguración que contará coa participación do alcalde de Tui, Enrique Cabaleiro, xunto a representantes da Xunta de Galicia, da Deputación de Pontevedra, do Concello de Tui, do Cabido da Catedral, da Sociedad Española de la Camelia e da International Camellia Society, e de ATUCA.

O vindeiro luns, 22 de xaneiro, ás 19.30 h na Sala Félix Rodríguez, terá lugar a presentación do libro de poemas “Mis dos amores” da moza tudense, de 15 anos de idade, Inés Martínez. 

Nesta presentación a autora estará acompañada polo profesor Felín Romero Lorenzo e por Ángela Martínez Gómez que abordarán nas súas intervencións, respectivamente, o comentario deste libro así como unha visión da traxectoria poética da autora, que a pesar da súa idade leva moito tempo dedicada con intensidade á creación literaria.

Os e as lectoras de honra de Biblioteca Municipal de Tui recibiron hoxe os seus diplomas. Anualmente o centro bibliotecario tudense recoñece ás persoas que máis libros levan en préstamo coincidindo co “Día dos usuarios das bibliotecas”, que se celebra o 11 de xaneiro. É unha xornada de recoñecemento aos principais protagonistas da actividade bibliotecaria, pois as persoas usuarias son parte imprescindible deste servizo público que ten como principal misión favorecer o acceso á lectura e á información da cidadanía.

O próximo luns, 15 de xaneiro, ás 19.30 h presentarase na Sala Félix Rodríguez, no edificio Francisco Sánchez, o libro “Sueña como Arela” de Sara Alonso, ilustrado por Mariña Bona e editado pola editorial Badidi-Bú. Esta presentación está organizada pola Biblioteca Municipal de Tui.

Miles de persoas recibiron nas rúas de Tui e Valença aos Reis Magos na única Cabalgata Internacional que se celebra entre España e Portugal. Máis de 500 persoas participaron activamente neste evento formando parte da comitiva real de Melchor, Gaspar e Baltasar. Dende a estación do tren de Valença até o Teatro Municipal de Tui os Reis Magos derrocharon maxia, ilusión e 1.500 quilos de caramelos, que fixeron as delicias de todas as persoas que se achegaron a presenciar o seu paso.

A Biblioteca Pública Municipal de Tui realizou ao longo do pasado ano 2023 un total de 14.536 préstamos de libros que a un total de 1.066 usuarios activos da Biblioteca tudense, dos que 431 eran infantís e 634 maiores de 14 anos de idade.  A media foi de 1.211 préstamos ao mes que supoñen case 50 libros ao día.

Onte, mércores 3 de xaneiro, o Salón de Plenos da Casa do Concello de Tui acolleu o acto de entrega dos premios do concurso de debuxo escolar destinado a escoller a Postal de Nadal do Concello de Tui. Trátase da cuarta edición deste certame que contou con postais enviadas por alumnos e alumnas dos seguintes centros escolares tudenses: CEIP’S de Caldelas, Pazos de Reis, Randufe, Guillarei e Rebordáns  así como o Colexio Santa María – Maristas de Tui.

Melchor, Gaspar e Baltasar volverán a percorrer este venres, 5 de xaneiro, ás rúas da Eurocidade Tui-Valença. As súas Maxestades de Oriente chegarán ás 16 h até a Estación de Valença, onde serán recibidos polas autoridades locais.  Ás 17 h nas súas magníficas carrozas coidadosamente decoradas e iluminadas iniciarán un percorrido de 3,5 quilómetros. Coma veñen facendo dende 2010 os Reis Magos protagonizarán a única cabalgata internacional que se realiza entre España e Portugal.